早前楊振寧孖住老婆翁帆喺中環食晏，今年踏入「雙八」年華嘅楊生精神同胃口一樣咁好，連甜品都食得晒。好talk得嘅佢仲搞到掛住聽佢講嘢嘅楊太，對住令女人着迷嘅朱古力蛋糕，都只係淺嘗輒止。食飽飽，楊太自動波打開手袋攞銀包埋單，然後指一指杯清水，楊生就「好聽話」咁飲番啖然後先起身走。

除咗細心之外，楊太仲跟實老公，即使楊生喺餐廳出嚟帶錯路，楊太只係同老公相視而笑，一啲投訴都冇。楊太話今次因為有啲事要搞，所以兩公婆先過嚟香港住幾日，佢仲話老公同「光纖之父」高錕都係中大人，大家好熟，所以之前見過面敍舊添。