呢嗱，佢又有新搞作嘞，前晚突然發表聲明，話依家係引退嘅適當時刻，已經向政制及內地事務局局長林瑞麟表明，七月底任期屆滿後唔打算連任喎。

港府回應同樣耐人尋味，唔夠兩粒鐘就發聲明話，短期內會公布下任私隱專員嘅任命，等於話，你走還你走，政府唔挽留。

私隱專員吳斌似乎未夠喉，又話希望由年輕人接棒，向港府爭取更多資源為公眾服務。至於審計署舊年批評私隱專員公署「大花筒」，佢話立法會帳目委員會報告已經肯定咗公署嘅工作。言下之意，私隱專員公署做得都冇問題，就算有問題，都係因為資源不足啫，唔關佢吳斌事。

點知呢下又畀港府窒，當局尋日話，對私隱專員公署嘅撥款已經由二○○七至○八年度嘅三千六百二十萬，增加至二○一○至一一年度建議撥款四千八百六十萬，多咗成三分之一，好明顯想塞住私隱專員公署把「獅子口」啦。

吳斌仲有口水噴o架，被問到係咪因為同港府有拗撬先唔想繼續撈，佢更加九唔搭八話自己「對工作有熱誠」，就算人工減半都肯制。咪扮嘢啦！當初獲委任時又唔見佢企出嚟話五折支薪，家陣就嚟唔撈就講到咁風騷，仲有冇虛偽啲呀！

叮！好似私隱專員公署咁嘅政治花瓶，掛住公營機構嘅名，每年公帑使咗唔少，有建設性嘅正經事冇做過幾件，但行政混亂、大花筒新聞就一籮籮。

政府撥款年年增加，佢哋年年嗌窮不特止，問題從未見改善，納稅人愈來愈失望。嗱，吳斌○五年上任嗰陣，已經面對前署理私隱專員林永康嘅「大花筒」事件，直到舊年十一月，私隱專員公署依然畀審計署批評浪費公帑同行政混亂，包括豪花公帑為前專員鄧爾邦舉辦歡送派對，同未能依時處理投訴等。

政府部門同公營機構久唔久就爆出唔見咗USB手指呢類私隱外洩醜聞，早排警方反校園吸毒嘅臥底行動資料外洩，更加等同對港府吹到行嘅校園驗毒試行計劃摑咗一巴。納稅人每年投入咁多資源，私隱專員公署做過啲乜？

計太一叮話齋，就算請過個私隱專員，如果唔搵出問題所在，唔徹底改變機構內部濫用公帑嘅風氣，就等於換人唔換腦，繼續增撥資源，私隱外洩問題一樣冇改善，「大花筒」醜聞照舊出現，咁同繼續揼錢落鹹水海有乜分別？不如執咗佢一了百了啦。叮！