小白觀點：社工陳腔濫調嘥氣
先有科大碩士畢業生跳樓，再有港大生吊頸自殺，究竟依家啲大學生發生乜嘢事？有專家話佢哋冇咗「天子門生」光環，壓力大增，好易鑽牛角尖出事喎，講咗等於冇講！
其實喺呢個特區政府管治之下，唔單止大學生冇光環，香港人全部都變晒港燦，一樣覺得自卑好大壓力，好心社工唔好再陳腔濫調，左一句生命意義、右一句面對挑戰，與其勸唔掂，倒不如試吓靠嚇啦。
當局好應該增撥資源，搵問米婆請一啲自殺亡靈上嚟，以過來人嘅身份講講下面嘅經歷，等大家知道自殺唔係一個結束，而係另一個更恐怖更苦難嘅開始。因為喺嗰個未知世界，有阿鼻地獄、沸屎地獄、灰沙地獄，仲有尖石地獄、飲銅地獄，原來自尋短見係要日日喺油鑊游十個塘，仲要晚晚勾脷筋，睇吓仲敢唔敢得閒冇事做走去自殺！
e-mail：sunsiupak@gmail.com
Blog：http://sunsiupak.blogspot.com
阿豪觀點：冇對症下藥太可惜
唔知點解，呢排發生好多大學生自殺嘅悲劇，繼早前女大學生因為男朋友唔肯陪佢倒數慶祝而自殺，近日又先後發生科大碩士生跳樓、港大生吊頸嘅不幸事件。唉……後生遙遙，大把前途，因乜事咁睇唔開呀？
港大生自殺謎團終於解開，原來係因為受滿面暗瘡困擾，做過激光磨皮手術但係都冇乜幫助，於是就走上輕生絕路。
為咁小事就要生要死，講到尾，都係介意人哋點睇自己啫。如果呢位港大生知道佢身邊朋友因為佢離開而咁傷心，而且冇一個人提及佢嘅暗瘡，相信一定好後悔自己嘅輕率決定。最無辜嘅係，據皮膚科醫生講，激光磨皮可以去除暗瘡留低嘅疤痕，但本身並冇療效，要改善暗瘡問題，應少食煎炸嘢同減少壓力。
唉，與其咁快諗到死，點解唔對症下藥諗吓點解決問題呢？
e-mail：lukchiho75@hotmail.com
Blog：http://lukchiho.blogspot.com
網友觀點……
陸克文：可唔可以話係專上教育八萬五惹出嚟嘅禍呢？
唔明解：學生哥尋死不外乎為情為學業啫，依家仲多埋為暗瘡！
懶 人：呢幾代大學專製造騎呢怪，大家見啲宿舍玩淫賤遊戲，又有大學生非禮就知啦！
奇 哥：依家啲大學生真係讀壞腦，難為父母辛苦供養，唉！
有料爆：
又地震又海嘯，依家至2010咋！
SMS傾埋一份：6016 2496