Bunny由二月七號放假到二十四號，連續十八日橫跨農曆新年，一口氣暢遊南美智利、巴西同阿根廷三國。今次佢同太太再度蜜月，擺低咗對寶貝仔喺香港，全程靠視像電話通話免得心掛掛，十幾日旅程使咗兩萬幾蚊電話費，再加埋衞星上網費，難怪佢話電話費加上網費仲貴過機票啦！

雖然係咁，佢都話此行圓咗多年嚟嘅南美夢，旅程嘅所見所聞仲帶嚟好深刻體驗同感受添，印象至深嘅係康塞普西翁，當地貧富懸殊嚴重，貧民區多數興建喺山上，感覺好似香港六十年代嘅臨屋區同木屋區。