翻政黨反口舊帳

煲呔曾上禮拜四喺禮賓府閉門會見專業會議四名議員，據了解，專業會議議員梁美芬喺會面中要求政府重推首次置業貸款計劃，強調大部分立法會黨派都支持有關建議，又話政府都好應該諗諗適量重建居屋。但煲呔曾嘅反應好大，猛數當年八萬五政策推冧咗成個樓市，最後要由當時做財政司司長嘅佢幫手補鑊，用公帑資助市民買樓撐住個市，仲話呢個時候推出首置，可能反令樓市火上加油。

講講吓，煲呔曾仲喺席間大翻舊帳，話當年立法會各黨派一致舉腳支持八萬五政策，其中白鴿黨嘅李永達仲話八萬五千個單位都唔夠，叫政府起多五千個居屋砌夠齊頭數九萬，點知金融風暴殺到，負資產怨氣升溫，啲政黨又全部掉轉槍頭鬧爆政府，所以煲呔曾話佢至今都記憶猶新。或者煲呔曾驚新一輪八萬五災難多啲，話晒當年老董都係因為咁而腳痛落台。