上京帶保濕面霜傍身

早前阿Ann出席友好協進會新春酒會，着一襲橙紅色唐裝上台做司儀，原來件衫係「上海灘」出品，盛惠約三千蚊。佢透露早前喺「上海灘」掃咗幾件唐裝，包括當日呢件。問阿Ann點解咁鍾情唐裝，佢話唐裝畀人端莊大方嘅感覺，出席酒會唔失禮，加上款式襟睇，買多幾件都唔怕過時。

早兩日，阿Ann上京開兩會，又以一襲黑色絲絨唐裝上機。睇真啲，原來件衫同出席協進會嗰件剪裁一樣，但顏色花款就唔同，秘密原來係底面都着得。講到上京，女士都驚北京天氣凍兼乾燥，護膚最頭痕，阿Ann就帶定支Estee Lauder Time Zone抗皺保濕面霜，佢話搽咗兩年發覺補水功效一流，出差去凍嘅地方一定帶番支傍身。