本港名人二代愈嚟愈熱衷社會事務，香港青聯主席陳仲尼早前透露，由佢哋班青聯姊妹組成嘅青聯賢慧社，四月九號會搞個「愛家日」，到時會帶觀塘區二百五十個低收入家庭嘅小朋友同埋佢哋嘅家長，去海洋公園玩番一日。賢慧社召集人係港協暨奧委會秘書長彭沖嘅囡囡彭芷君（圖），佢盛讚賢慧社一眾姊妹慳家兼賢慧，話咁快個社已經有儲備喇。
去年聖誕節，青聯嘅朱鼎健做聖誕老人，捐咗六萬八千蚊畀賢慧社，支持呢個海洋公園活動，但彭芷君話呢筆錢仲未使動用，事關個活動有好多人支持，例如扮嘢文包起入場券、四洲集團太子女戴凱欣送零食，仲有龍昌贊助玩具，所以基本上呢個活動都唔使點用錢。
彭芷君仲話，佢哋成班姊妹個個賢慧，最叻知慳識儉。除咗物資之外，彭芷君話到時扮嘢文、醫管局主席胡定旭以及政府高官都會嚟主禮，認真畀面！