吳斌尋日承認佢咁早表明無意續任係先發制人，仲反問：「有邊個諗過政府會續我約？因為我嘅工作唔係討好政府。」佢話自己上任時已經諗好一到期就走人，而且舊年仲做咗份工作報告交代「身後事」，講到自己早就執定包袱、想打爛呢個飯碗。

淨識攤大手板嗌擴權

臨行出政府道大門，吳斌尋日都抓緊機會，不遺餘力咁狂數政府孤寒，佢話：「我唔夠米煮飯，惟有煲粥囉！」之後仲寸爆林公公上到立法會先肯應承加資源，又話：「我厭惡呢啲生活，見到人就呻窮。」政制及內地事務局發言人就話，新財政年度會向公署增加撥款四千八百多萬元，較三年前多三分一，但吳斌都係一句唔夠。

其實，佢在位五年，做過幾多嘢真係自己至知囉，市民淨係見佢同政府攞錢、要求擴權，或者出埠等，或者佢份工作報告應該列明埋佢仲做咗幾多工作。早前平等機會委員會被踢爆鄧爾邦鬼祟離任，結果出現主席真空期。吳斌尋日不忘「提醒」林公公要盡快搵繼任人，最好係佢七月三十一號離任，新專員八月一號就返工，而下任專員最好同佢一樣有法律背景，話咁先有效處理投訴。其實政府請人，真係要帶眼識人，如果請到吳斌嘅翻版，納稅人一樣係倒錢落海。