25/02/2010

播放本新聞相關短片

經濟蓬勃未有期 就業導航向何方

唔知點解,每年財政預算案,財爺鬍鬚曾都會提出一啲古靈精怪嘅支援就業措施,舊年有個帶頭製造廉價勞工嘅「大學畢業生實習計劃」,今年又推出個為期兩年嘅「就業導航試驗計劃」,向接受勞工處深入就業輔導及職位選配服務後就業滿三個月嘅市民發放五千元獎金,以二萬二千個名額計,整項計劃大約要使一億四千萬公帑。

又係唔知點解,聽到鬍鬚曾嘅「就業導航試驗計劃」,太一叮諗起六十年代內地嘅一首革命金曲,《大海航行靠舵手》:「大海航行靠舵手,萬物生長靠太陽,雨露滋潤禾苗壯,幹革命靠的是毛澤東思想。」家陣香港政府講到明要幫啲失業人士「導航」,頗有一種普度眾生嘅激昂鬥志,睇嚟,失業大軍有救咯!

講笑咋,大家唔好咁開心住,等太一叮一一道來。嗱,話明就業導航計劃,對象當然係失業人士,而失業人士主要可以分成兩類,第一類就係好想搵工但係搵極都搵唔到嘅。對於呢類人來講,如果香港經濟好,市道旺,有工開,佢早就撲咗去做啦,使鬼你攞億幾銀嚟「導航」咩,叮!

至於第二類,就係好食懶做嘅社會寄生蟲,佢哋一係踎喺屋企攞綜援,一係就諸多藉口唔肯搵工,等老竇老母養,對於呢類人,無論你點「導航」佢都係唔郁嘅。退一步講,即使畀你用五千大元氹咗佢出嚟打工,筆錢到手後,份工嘅「吸引力」自然降低,到時又有大條道理辭工歸家。搞完一大餐,嗰億幾公帑使咗都係白使。

講到底,任何社會都有寄生蟲,而「杜蟲」有兩個步驟,第一步就係收緊綜援審批,拆走佢個懶竇,第二步就係提供輔導,改變佢嘅做人態度。家陣政府輔導又做唔好,綜援又亂咁批,反而諗出條打工有獎嘅屎橋,要納稅人攞億幾銀嚟補救佢哋嘅無能,你話係咪好荒謬呢?

叮!其實鬍鬚曾自己都識講,只有經濟蓬勃發展,香港先有更多就業機會。政府要改善就業,就應該對症下藥,諗辦法推動基建,搞好經濟,只要市道暢旺,市民自然有工做,失業率亦自自然然降番落嚟。政府大事唔做,淨係識得耍埋啲小打小鬧嘅花拳繡腿,到頭來都係得啖笑。

財爺啊財爺,家陣香港連經濟發展嘅前路都未睇到,你想將啲失業人士導去邊呢?