話說尋日朝早九點左右，政府總部中座嘅門打開，兩架各載住二、三十疊預算案嘅手推車沉甸甸咁緩緩推出，一疊疊預算案全部用雞皮紙包好，紙上清楚印有「Security」警告字眼，顯示要小心運送，不容有失。

運送甩轆係天意？

點知，當工作人員推到門口時，輕視嗰一級仔石級，平時手推車要倒後落石級，尋日就大模廝樣咁由前轆先落，結果「噗」一聲，其中一架車上嘅四、五疊預算案應聲落地，一直保密嘅青綠色封面設計迅即大曝光，吸引成班記者行家蜂擁而上先睹為快，引起一陣哄動。當時三、四十本預算案跌到一地都係，工作人員執都執唔切，新聞官擔心預算案機密內容曝光，急急上前幫手，三扒兩撥合力將兩車預算案沿路推番入大堂，再經停車場運走。

呢幕預算案運送甩轆事件莫非係天意，要預兆今年預算案會畀人插到飛起，局面似足倒瀉籮蟹？如果係嘅話，鬍鬚曾都要嘆句天意難違囉。尋日預算案公布後劣評如潮，社會狠批之聲此起彼落，鬍鬚曾要收拾殘局，佢嘅窘境肯定比嗰幾位「執書」嘅職員難睇得多。