立法會內務委員會聽日會選出由邊位議員頂替辭咗職嘅黃毓民，出任中大校董，公文袋余若薇同「五散人」嘅「波波」陳茂波為呢個位爭持不下。
尋日波波有啲勞氣咁話中大學生會早前邀請佢同余若薇出席今日舉行嘅校董候選人論壇，但佢要出席西九會議去唔到，本來學生會答應改第二日舉行，但最後維持原判，事緣余若薇嗰日唔得閒喎。
波波話兩個日子都係只得一個候選人出席，學生會擺明「大細超」，遷就余若薇。佢又爆料話中大學生會夾埋兩個中大校友同員工組織，聯署去信呼籲立會議員投票畀余若薇，擺明有立場。
咁搞法，難怪波波咁㷫啦！佢好勞氣咁話自己喺大學時代都好熱衷學生活動，曾經好有激情，但做事最緊要公道，中大學生會唔應該以既定立場打擊佢。睇嚟波波呢次真係激到出煙嘞！
不過，中大學生會尋日回應話佢哋堅持今日搞論壇係場地問題，唔係偏幫任何一邊喎！