舊年本港經濟差，慈善機構撲水都好艱難。東華三院主席李三元日前喺東華總壇搞新春團拜，向逾百名員工大派利是，又盛讚員工過去一年表現出色，不時三更半夜收到員工發嘅工作電郵，令佢好感動。佢都交出漂亮嘅成績，舊年東華籌款數字不跌反升仲創新高，具體金額就不便講嘞，最難忘係有位善長一次過捐款逾五百萬元。
佢好自豪咁話舊年募捐全靠真材實料，一次都冇揼過朋友心口，寧願以軟銷方式如實交代東華服務眾多，開支龐大，善長聽罷深受感動，更樂意捐款撐東華。
為咗令東華年輕化，佢早前一力促成拍攝一部宣揚東華人道精神嘅電影《東風破》，三月二十六號會舉行首映。佢賣關子話套戲完全冇說教意味，仲起用年輕新進導演，兼且搵嚟甘草同新進演員大演對手戲添！