25/02/2010

播放本新聞相關短片

政情:賭王包起婦協春茗全場酒席

香港各界婦女聯合協進會尋日搞新春晚宴,城中名太玩個不亦樂乎。年年捧場嘅賭王何鴻燊因為抱恙在身,今年冇亮相,但佢人唔到錢照到,包晒全場一百二十圍酒席,仲拍心口承諾出年照樣包場,兼以全新形象示人。

婦協主席林貝聿嘉喺晚宴帶領核心成員行「貓步」進場,人人身披閃令令披肩,婀娜多姿。啲披肩由新移民婦女親手做,名太們以五位數字掃咗五十條以示支持,齊聲呼籲姊姊妹妹站起來。

林太致辭時預告婦協喺灣仔鵝頸橋底嘅「新竇」─「香港婦協郭得勝服務中心」今年十月將竣工,中心會引入陽光同海風,正到極!佢希望有日可以走出天橋底,為婦協爭取更靚嘅會址。

玩具大王蔡志明太太、邱達昌夫人同全國政協蔣麗芸等都盛裝出席晚宴。舊年妙語連珠嘅賭王正養病中,只派千金到賀。賭王千叮萬囑阿囡講幾句,祝婦女們虎虎生威,但推動婦女事務就咪馬馬虎虎,仲約定班闊太出年喺春茗上再會,引嚟如雷掌聲。