早兩日見到富貴黨前副主席「莎姐」周梁淑怡拎住個紅色漆皮手挽大袋去富貴黨嘅新春團拜，個袋並非舶來品，而係出自香港自家品牌，仲係「方剛牌」添！佢黨友方剛做成衣，旗下有幾個時裝牌子，今次莎姐用嘅係Jessica。
莎姐係「方剛牌」長期熟客，佢呢位老主顧一早做咗VVIP，每次幫襯都有折頭，所以買嘢一啲都唔貴，好似今次呢個袋咁，原價四位數字頭，買到第四個仲唔使呢個價錢添！佢仲話原本買咗個黑色，貪佢間隔好，連A4文件放落去都唔皺，但用用吓怕佢會殘，急急買多個黑色做「士啤」。
講講吓方剛行過，一眼認到係自家出品。大家講開折頭，佢忍唔住幽自己一默，話如果攞佢張卡片入去買嘢，一定有特別價……即特別貴價，起碼收高二十巴仙，所以勸大家自己做熟客仲好，折頭實惠過用佢個名。