位於沙田石門嘅新界鄉議局新大樓工程正在趕工，希望趕及出年舉行新春團拜，局方亦繼續傾力籌募建造費，同不斷漲價嘅建築材料競賽。之前好多商界大孖沙已慷慨科水支持，目前局方正向「漏網之魚」募捐，主席劉皇發前日就聯同副主席張學明帶領一班鄉紳去拜訪華置董事劉鳴煒（圖）。
發叔同張學明分別向劉鳴煒介紹鄉議局嘅角色同工作，大家交流氣氛相當融洽。據聞，劉鳴煒相約發叔稍後再會面，洽談贊助新大樓建造費問題，相信好大機會成事。其實鄉議局籌款與否都係隨緣，但班鄉紳對劉鳴煒觀感好好，大讚佢一表人才。劉鳴煒喺富豪二代之中，向以踏實、成熟同節儉見稱，難怪班鄉紳有呢個觀感。
