本文重點
財政預算案對本港未來一年嘅發展同社會各階層都有深遠影響，本應係全城期待，但係財爺鬍鬚曾又重施故技，喺尋日公布嘅下年度嘅預算案冇料到，提出嘅建議都係小修小補，紓困措施炒冷飯，長遠扶貧策略又交白卷，兩粒鐘嘅發言又長又悶，除咗講到煙草稅時令一眾高官同議員醒一醒之外，其餘時間佢哋都不敵鬍鬚曾播放嘅催眠曲，有啲走咗去搵周公，當鬍鬚曾冇到。
喺高官當中，瞓得最勁嘅莫過於瞓到捲埋一舊嘅教育局局長孫明揚，有每周一鑊之稱嘅食物及衞生福利局局長周一嶽同坐喺佢隔籬嘅商務及經濟發展局局長劉吳惠蘭都有份，唔知係咪會傳染嘅呢？
坐喺議事廳公眾席嘅一眾行會成員亦唔執輸，阿Ron夏佳理同「金刀梁」梁智鴻都收到周公嘅奪命追魂Call，金刀梁仲瞓到跣低晒，睇嚟鬍鬚曾嘅催眠曲好收效喎！
咪以為戴住假髮同口罩冇人認得出，就係因為太突出，所以民協嘅馮檢基搵周公亦特別顯眼，而建仔嘅黃定光亦都大覺瞓。
大模廝樣玩手機睇書
唔知係想打發睡意吖，抑或真係咁忙，政務司司長唐唐同公務員事務局局長俞宗怡係咁喺度捽自己部手提電話，金融界議員李國寶都有類似舉動。
有啲議員都算有先見之明，為咗解悶，白鴿黨嘅甘乃威同衞生服務界嘅李國麟事前影咗一大疊有關政改嘅剪報入去刨，費事白白浪費時間聽鬍鬚曾唸口簧。富貴黨張宇人同經濟動力梁君彥就一味喺度玩電話，張文光就掛住上網 Check Email，總之就齊齊當財爺透明。
不過最當鬍鬚曾透明嘅，就非白鴿黨鄭家富莫屬嘞，事關佢大模廝樣咁拎住本《上海一九四九》睇足粒幾鐘，事後仲同我哋講預咗鬍鬚曾唔會有乜新嘢噏，相信一路睇書一路聽都唔會走雞喎！