狼來了煩死地球先生
有團體發起齊齊熄燈一小時運動，主辦單位估計有三百萬港人支持，話可以喚起市民環保意識喎。我就覺得呢啲只係有姿勢冇實際嘅環保騷，冇用之餘仲可能弄巧反拙有反效果添。
試諗吓，孤男寡女黑麻麻冇電視睇，又冇麻雀打，你話有乜好做呢？仲有乜嘢好得過搞嘢吖！以前美國試過發生大停電之後，爆咗個嬰兒潮出嚟，所以要證明今次停電一小時係咪成功，只要過多十個月之後，睇吓有冇突然多咗一百幾十萬個B出世，加入消耗地球資源大軍就知啦。
其實人類嘅存在已經係最唔環保嘅事，特別係環保人士，成日狼來了靠嚇，講到氣候暖化問題幾咁嚴重，之但係睇番呢個冬天吖，全球都被冰封，點解冇人出嚟話係全球冷化問題嚴重呢？拜託，少啲講廢話，地球先生就唔會畀佢哋煩死嘞。
電郵：sunsiupak@gmail.com
Blog：http://sunsiupak.blogspot.com
大杯酒大塊肉最環保
三月二十七號係一年一度嘅熄燈一個鐘環保大行動，據香港嘅主辦單位講，估計當日有三百萬港人支持，真係咁勁？除咗熄燈，原來仲有好多減碳招數，好似話拒絕備用電器、縮短四分之一沖涼時間、少用即棄餐具、多菜少肉等，大家會唔會跟呢？
老實講，豪伯都好希望呢個行動可以成功舉行，但好老實講，對於豪伯呢一類無肉不歡嘅食肉獸嚟講，你叫我有手尾熄燈、熄電器，呢啲完全冇問題，但係你講到少肉多菜喎，當堂企喺度啦！
諗深一層，大家千祈唔好以為食齋嘅人一生排出嘅二氧化碳真係比食肉獸少，因為飲食唔健康嘅人，命都零舍短，早啲離開呢個世界，埋單計數排出嘅廢氣都會少啲。所以話呢，大家為響應環保，反而應該大杯酒、大塊肉！
電郵：lukchiho75@hotmail.com
Blog：http://lukchiho.blogspot.com
網友觀點……
陸克文：聽講用一次谷歌搜尋器嘅耗電量等於煲一煲水，搞個全民罷用谷歌一小時運動仲有意義！
孔乙己：同樣為環保，「有衣食」行動回贈現金較徵膠袋費更有誠意。
環保張：三百萬人支持熄燈？又學埋遊行政客咁報大數？
李怒眉：啲人克制自己一小時後，可能變本加厲用凸都未定！