天水圍被稱為悲情城市，呢間中學有啲學生甚至連中環都未去過，不過學生製作嘅電腦動畫就頂呱呱。不妨睇下佢哋嘅威水史：動畫《成就》喺澳洲莫納什大學資訊科技挑戰賽獲第一名兼年度大獎，《挽救古蹟，留存世代》獲3D電腦動畫組冠軍，《我的父親》同《無形的愛》亦獲多個獎項。呢幾部片同時亦喺美國、中國內地等主辦嘅國際賽獲獎。

嘩，原來連屋邨中學都咁威水，唔怪之得港府夠膽將創意產業當作六大優勢產業之一啦。不過咁，學生威水完全唔關政府事，全靠一位叫做翁國基嘅企業家有個電腦動畫教育夢。

翁生堅信知識可以改變命運，所以捐咗一千五百萬元，幫學校成立電腦動畫製作中心，又開設立體電腦動畫必修課，話要令學生掌握一技之長，畀貧苦學生有機會脫貧。最難得嘅係班學生幾生性，唔單止為港爭光，仲令學校揚眉吐氣。

如果唔係呢位企業家敢想敢做，慷慨解囊，學校根本唔會有咁嘅成就。正如翁生話齋，當局根本冇發展動畫嘅動機，佢仲踢爆，曾蔭權有次嚟頒獎，得獎嘅學生問佢，政府會唔會幫佢哋發揮專長，煲呔曾滿口應承，卒之咪又係不了了之。靠政府幫手？蛇都死啦。

係人都知道，要推動創意產業，一係要錢，二係要人才。其實培養人才亦離唔開錢，照理錢應該唔係問題，港府庫房水浸，錢多到用唔晒，攞少少出嚟發展創意產業，易過借火啦。

如果咁諗就錯咯，政府係有大把錢，但係要睇用喺邊度。為公務員加人工，眼都唔眨，不過，要發展創意產業咯喎，食自己喇。

講真，自從煲呔曾提出發展六大產業之後，做過乜嘢吖？最架勢係預留咗幾塊地皮，話要發展醫療同教育產業喎，而創意產業只係得個講字。

叮！講到對電腦動畫技術嘅支持，香港唔單止比唔上美國、日本，連內地都比唔上。內地有啲地方政府直接向企業提供軟硬件，反觀港府淨係用自由市場經濟做擋箭牌，乜都唔做。

叮佢個鎯鎯，唔肯出錢就算啦，財爺曾俊華仲要講風涼話，佢話喎，如果真係有創意，可能係唔需要錢。真係畀佢吹脹。

政府葉公好龍，創意產業惟有自生自滅，加上大環境唔掂，連製作動畫電影《阿童木》而哄動一時嘅意馬動畫工作室都要清盤。唉，政府吹水要推動創意產業，依家連大創作公司都執埋，呢一巴簡直摑得應。

想當年，香港嘅電影、漫畫等創意產業喺兩岸三地認第二，冇人敢認第一，今日竟淪落到要民間自救，苟延殘喘，真係失禮死人！難為煲呔曾仲話要靠佢發展香港經濟，唔好發夢啦。叮 !