小白觀點：奪金港隊打回原形

尹佬五十三歲就去咗，又一香港足球明星隕落，真係可惜。本欄對於香港球壇愛之深恨之切，恨鐵不成鋼，記得東亞運港隊打贏日本嗰役，全港市民亢奮得腦袋發熱，本欄叫小朋友要諗清諗楚至立志要做足球員，當堂畀網民狂插妖魔化香港足球、乘機抽水咁話。

冇錯，咁潑冷水法係有好多人唔啱聽，但你睇吓元祖級足球員生活幾潦倒吖，堂堂香港足球先生因經濟出問題狂啪四十粒安眠藥，又有球隊連球員勞工保險都買唔起。事實勝於一切，港隊也文也武威風咗一陣，近排出去咪又做番魚腩部隊，賺番嚟嘅蛋，食到去復活節都未食完呀；仲有個所謂港足新星，人哋外國球星嘅技術未學到千分之一，但爛滾夜蒲就學到十足。話時話，本欄要抽水都唔會抽一潭死水啦，係咪？

Blog：http://sunsiupak.blogspot.com

阿豪觀點：亞洲第一風光不再

有「亞洲第一中鋒」之稱嘅尹佬尋日病逝。雖然豪伯唔算係一個標準足球迷，但可以好肯定咁講一句，尹佬係香港演藝圈裏面踢波最叻嗰個，亦都係球壇裏面演技最好嗰個。

提到「亞洲第一中鋒」呢個名，真係幾令人唏噓。依家講足球嘅「亞洲第一」，大家唔係即時諗起日本就係南韓，其實我哋香港嘅足球以前一啲都唔失禮人，尹佬嗰一代球星自然唔在講啦，好似阿叔咁都戰績彪炳㗎！

可惜時至今日，香港要做足球「亞洲第一」唔係話唔得，只不過可能個名詞要改少少，改為「亞洲第一魚腩」就差唔多。冇錯港足係喺東亞運威過一陣，仲攞埋個金牌添，但喺早排嘅東亞錦標賽一樣慘變「三零部隊」，埋單計數三場失成十球，真係陰功。

Blog：http://lukchiho.blogspot.com

網友觀點……

豬標哥：米雪記住要振作呀！我哋支持你！

球迷世界：新年流流發生啲咁嘅事，真係有啲唔開心……

伯爺公：唔知電視台會唔會推出「尹佬紀念特輯」呢？

Nc：真係英年早逝，希望尹佬可以安息啦。

小B：香港嘅足球猛將買少見少，唔怪之得咁難引人入場啦。