初三赤口唔拜年,城中名人各趁假期搵節目,適逢沙田馬場尋日有賀歲盃,入馬場成為新年節目之一,馬會大董、全國人大常委范徐麗泰有孝順仔范駿華陪伴入場。講到新年願望,范太祝願新年人人都過得開心,問佢想唔想抱孫?范太就笑而不語,明顯唔想令到個仔有壓力。
尋日馬場仲有好多有影皆雙嘅名人夫婦,好似馬會大董葉澍堃一家、太古(中國)主席陳南祿、港交所主席夏佳理、前立法會秘書長馮載祥等。
舊年年底先新婚嘅立法會議員涂謹申都攜眷入場,保險界陳健波亦陪同太太睇賽事,陳太甜絲絲咁話老公成個人陪佢,呢份情人節禮物非常滿意。似乎阿涂同陳健波都趁初三補度情人節,氹太太咁有心,赤口都冇有怕啦。