17/02/2010

播放本新聞相關短片

政情:五散人分工細各展所長

立法會幾大黨勢均力敵,幾個席位唔多嘅關鍵勢力更形重要,有「五散人」之稱嘅議會五子就係例子嘞。其中一位「散人」、代表資訊科技界嘅譚偉豪(IT豪)日前同傳媒團拜時透露,佢哋「不散之謎」係每人各安本分、各有所長兼能各展所長。

IT豪話雖然「五散人」睇落鬆散,但保險界嘅陳健波做嘢出名穩陣同細心,周不時都會幫其他「散人」計吓數,仲會不停提醒大家要開多啲會同問多啲問題,形同佢哋嘅隱形黨鞭。而一向同官場關係唔錯嘅廠商會林大輝,就專責幫佢哋約官食飯同會面,等其他「四散人」代表嘅業界意見可以迅速直達政府核心。會計界陳茂波就係最熟書嗰個,所有立法會文件都刨到滾瓜爛熟,成為大家嘅活字典。

而佢本人係「五散人」資訊科技顧問兼傳媒大使,專幫各「散人」收發最新資訊。醫學界梁家騮就繼續扮演佢嘅「搞局怪醫」角色,不時諗啲怪招刁難政府,仲會免費幫其他「散人」解答吓啲醫學問題,確保大家都健健康康。

呢種分工精細得嚟又無迹可尋,難怪家吓佢哋都合作愉快啦,就連對「散人」呢個稱號都非常滿意,希望呢個狀態可以延續落去。