本文重點
新年期間成日飲飲食食，佳節之後，好多人又要地獄式瘦身嘞。保安局副局長黎棟國今年好盡興，幾乎日日都食年糕，尋日出席個活動時，佢坦言都擔心超磅，所以擔任苗圃行動「行路上廣州」籌款活動嘅開步禮嘉賓冇偷懶，由沙田中央公園行到位於馬鞍山嘅香港體育學院，借做善事嚟減磅，一舉兩得。
赤口照拜年
黎棟國以前做入境處時，每年過年都要返工，仲要應付一年多過一年嘅過關人流；今年做咗保安局，唔使再親力親為做前線工作，日日陪住屋企人，難怪樂極忘形啦。
佢透露呢幾日節目十分豐富，初一去睇花車巡遊，初二就陪太太去維港睇煙花，雖然好多睇完煙花匯演嘅市民都話太大霧睇唔清楚，但黎棟國話睇得好清楚，仲睇到由煙花砌成嘅虎形圖案。至於尋日初三赤口，佢就冇顧忌，去完苗圃行動活動後就會過海同親戚拜年。