17/02/2010

播放本新聞相關短片

政情:煲呔曾振興科技得把口

特區政府冷待科技研發,教育界更多次狠批港府投入嘅資源太少。煲呔曾尋日喺自己嘅網誌度撰文大講科技,但通篇卻得把口,睇真啲只係搵諾貝爾物理學獎得主高錕同幾名港產科技少年過橋,同時絕口不提資源。齋噏點可以振興科技㗎?煲呔曾真係以為吹水可以當秘笈呀?

煲呔曾喺網誌度話,高錕嘅一生成就係始於少年時期對科學嘅熱熾之心,咁啱幾名科技少年都係自細「拆嘢大」嘅人,讚賞佢哋有共同之處。到咗尾聲,煲呔曾畫公仔畫出腸,話幾名科技少年對家人、師長甚至大學實驗室、教育局資優教育組嘅特訓保有感恩之心,令佢更添欣賞之心。兜咁大個圈,似乎佢嘅目的係要話畀人聽呢啲成就都同政府有關。

同科技少年嘅會面完畢之後,佢送贈咗本高錕嘅自傳《潮平岸闊》同一個港產USB HUB(分線器)畀佢哋,希望呢批學生可以從中得到更多啟發。一個USB HUB可以啟發到啲科技少年乜嘢?真係好難想像,好心煲呔曾唔好咁縮骨,老老實實喺嚟緊嘅預算案度增撥資源畀啲大學發展科研好過啦!