本文重點
農曆新年係普天下華人最重視嘅節日之一，利是、年花、過節食品一樣都唔可以少，有啲要穿梭幾地過節嘅市民更要準備定幾款利是，近年港人多咗準備人民幣利是，方便上到內地可以隨時派利是。港區全國人大代表陳智思（Bernard）日前透露，佢每年過年都要準備定三款利是，分別係港幣、新加坡紙同泰銖，名副其實派利是都要國際化。
Bernard話，佢本身係泰國華僑，太太就係新加坡人，一家人雖然喺香港定居，但每年過年，都會盡量按家族傳統返泰國過年，所以每年都換定泰銖、坡紙同港紙三種貨幣嘅紙幣，派利是時，仲要時刻提醒自己唔好攞錯利是嚟派。
家族辦醫院口碑佳
講番Bernard嘅家族，泰國最大嘅盤谷銀行就係佢爺爺陳弼臣創辦，近年陳氏家族仲喺泰國辦醫院，口碑甚佳，香港好多政商界名人都幫襯過，包括全國人大常委范徐麗泰同前高官馬時亨。而每年大除夕，佢哋一家人都會飛過去泰國同上百名家族成員食團年飯，今年大家夾唔到時間，所以年初一Bernard就改咗去太太娘家新加坡拜年，但三款利是都唔少得。
香港人準備利是嘅趨勢都反映咗社會嘅轉變，早二、三十年前，好多香港人嘅子女、親戚都喺英國，過時過節，港人除咗去銀行換港幣零錢外，換得最多嘅外幣就係英鎊。近呢十年，逢年過節換人民幣嘅人漸漸增加。有外幣兌換業人士話，今年稍為新啲嘅人民幣十蚊紙係寶，即使熟客早早落定柯打，佢哋都要限額兌換，好難滿足足額需求。