官場音樂椅早前氹氹轉，盛傳同發展局局長林鄭月娥唔咬弦嘅楊立門，轉頭就做咗民政事務局常秘，前晚兩人仲喺慈善晚宴上撞到正添！呢啲係咪叫冤家路窄呢？
楊立門前晚已急不及待以候任常秘身份出席青年委員會主席陳振彬揸旗嘅青少年發展聯會慈善晚宴，而林鄭亦在場，楊立門好眼利，主動同前上司打招呼，但叫佢同林鄭合照，佢就扭扭擰擰咁話：「唔使啦，影咗喇！」最後記者拉埋行會召集人梁振英兩公婆夾喺中間，佢哋先肯影大合照。到底兩人係咪有心病？真係佢哋至知嘞。
但林鄭顯然冇受不和傳聞影響，晚宴上興致勃勃咁拉埋主人家以手鈴奏出一曲《Twinkle Twinkle Little Star》搞氣氛。慈善晚宴合共籌得一百萬元，將撥聯會屬下嘅德育發展中心作營運經費。
同場仲見到民政事務局副局長許曉暉拖埋老公同囡囡出席，一家三口嚟張大合照，相當難得一見！