例如畀議員鬧爆溝通唔到嘅環境局副局長潘潔近排頻頻出動，連好複雜嘅廢電器電子產品回收徵費計劃都搞埋一份，尋日仲出席立法會小組會議做說客，但竟然連自己嗰瓣都搞唔清。

唔知係咪環保政策太亂，當白鴿黨李永達問緊個計劃嘅標籤制度，佢突然失魂話：「能源效應『標籤』計劃同回收計劃，係冇衝突嘅。嗰個標準係列明電器嘅能源效益……」

吓！竟然將標籤制度理解做能源效益標籤計劃，兩者風馬牛不相及，簡直係搭錯線，嚇到佢身邊嘅下屬即時提水，認真瘀爆。好彩議員都好忍讓，公文袋嘅余若薇好客氣咁幫佢更正，陳偉業則窒咗佢一句：「唔好以為派個靚嘅，我哋就會（通）過。」

唉！以往有啲民調顯示個別副局長嘅認知度上升，皆因做錯嘢或爆出醜聞帶挈，根本係反面教材嚟。若果潘潔因為呢次事件而認知度上升，唔知可喜定可悲呢？