據悉，嗰個家務員就係相中帶友人參觀禮賓府廚房、身穿紅白間短袖T恤嗰位肥哥哥，消息話佢係以公務員合約聘用，而事發日期係○八年十一月，當時煲呔曾離港赴秘魯利馬出席亞太經合組織領導人非正式會議見胡總，禮賓府虛空，防範鬆懈，間接造成今次事件。禮賓府有二十五個家務員，各司其職，呢位家務員喺有貴賓到訪時負責斟茶遞水，聽講幾得煲呔曾歡心，如果係真，煲呔曾真係要嘆句「日防夜防，家賊難防」囉。

今次「80後」玩轉禮賓府，引起網民激烈討論，有人懷疑禮賓府有嚴重保安漏洞，亦有人再次質疑煲呔曾嘅管治能力。

最搞鬼嘅係有心水清嘅網民，諗起新界鄉議局主席劉皇發大年初二喺車公廟為香港求得下籤，籤文全文係：「君不須防人不肖，眼前鬼卒皆為妖；秦王徒把長城築，禍來禍去因自招。」解曰：內有家鬼，自身不安，家宅不吉，求財不遂。牛年仲有二十日就完，估唔到煲呔曾都係避唔過，衰喺一個家務員手上，真係應晒籤文最後嗰句「禍來禍去因自招」囉！