今年開始，香港迪士尼樂園要披露業績，大鑼大鼓咁話入場人次升咗唔少，舊年度就有四百六十萬人次，較○八年升百分之二，四年幾嚟仲已接待過一千九百萬人次，個個都話好滿意樂園，會再返嚟玩。點知尋日開立法會討論迪士尼業績，就畀「怪醫」、醫學界代表梁家騮篤爆唔係人人都鍾意呢個「Magic」樂園。
有議員話入到迪士尼個個都開心，唔只係「80後」先會「合皮」。殊不知鑽石王老五怪醫竟然話，過去四年嚟都冇去過香港迪士尼，林健鋒唔係好信，問佢係咪講真？仲話聽講喺迪士尼求婚成功率好高，慫恿佢帶埋女友入去玩求婚，一定得！
迪士尼後來承認，根據非正式統計，原來香港七百萬人口中，有一百萬人乜樂園都唔會去，即係話對呢啲人，有幾吸引嘅宣傳伎倆都冇用。講到呢度，怪醫隨即笑笑口話自己係「電車男」。咦！唔知怪醫係咪等緊佢嘅愛瑪仕帶佢去樂園呢？