富貴黨員發功「保田」

富貴黨已明言唔會參與五區補選，意味田少唔會有機會入番立法會，如果連旅發局主席都冇埋，呢次田少唔慌唔「雙失」嘞。面對呢個一向係富貴黨囊中物嘅主席位隨時要嘔番出嚟，一眾黨員尋日喺立法會相關嘅事務委員會會議上都出盡力發功，未開口就旅發局今年工作計劃提問，身兼黨副主席嘅方剛先狂讚旅發局喺舊年咁艱難，年尾都搞到客量升番晒，對零售飲食影響甚大。

咪以為淨係自己友唱好，就連白鴿黨嘅劉慧卿都忍唔住口幫富貴黨直接問政府田少個位仲有幾耐做？仲當面話唔單止Jeffrey吖，出面仲有好多人吼住。

班議員諗住可以幫田少撥開雲霧見青天，但商務及經濟發展局局長劉吳惠蘭已離開，在場得番「芝麻官」、署理旅遊事務專員林錦平，估都估到佢點答啦，咪話唔評論，當局喺遴選人選時會考慮旅遊策略云云。

咁都未夠，接住黨主席Miriam劉健儀再加多腳，借田少揶揄政府，話非常欣賞旅發局做嘅預算，盤數咁靚，肯定做咗好多節流措施，如果政府學習到旅發局處理財政嘅手法，一定減省唔少資源！聽得出都知道Miriam係抬田少踩財爺鬍鬚曾啦！事關鬍鬚曾做咗幾年預算案，次次計錯數不特止，仲成日以「狼來了」嚟壓低市民嘅期望，但又派錯糖喎，管盤數差到咁，又抵畀人寸嘅。

不過，坐喺度嘅田少見到大家咁畀面，唔尷尬之餘，仲報以微笑。莫非佢已經收到好消息？