小白觀點：樸實肥妹溝死仔

近年好多女生鍾意搞到成手水晶甲，老實講，係佢哋至覺得靚。其實水晶甲內藏惡菌，帶Con刮損角膜隨時會盲添呀。

港女向來都係愛靚唔愛命，唔知點解，佢哋把口總係停唔到，唔係講隔籬Team阿Mary嘅壞話，就係一日到晚都食唔停，弊在食完又要去纖體，認真嘥米飯。試過有個身形有啲啲肥嘅女仔去買衫，畀個售貨員潤咗句「冇你嘥屎呀」，竟然轉頭走咗去死，以瘦為美呢種錯誤觀念真係害人不淺。

查實男人最愛有啲肉地，因為肥妹樂觀開朗、品性善良；相反，乾澀港女一般面容繃緊、生性刻薄。信我啦，做個冇水晶甲嘅小肥妹，真係溝死仔！

網友觀點……

三叔公

唔理好醜，跟潮流走。整埋水晶，似隻妖精。

小福

haaaa，咁爆笑，諗起都核突，同啲愛靚姐姐講吓先！

陸克文

個名真係呃得吓人，實情竟然係藏污納垢嘅溫床！

Wincy

都唔知啲人點解會鍾意gel層膠上去話靚，依家仲證實係唔衞生添，水晶甲行遠啲！

網址：www.sunsiupak.blogspot.com

阿豪觀點：翻生慈禧嚇壞人

依家啲女仔好鍾意整水晶甲，表面睇好似好靚，但原來內藏危機！一旦有細菌喺指甲入面，而又接觸到眼睛，分分鐘盲都似。

不過你同我定都得嘞，正如今日題目所講，唔少女生愛靚唔愛命，莫講話有機會盲眼啦，就算變癱都義無反顧。

唔知大家覺得水晶甲靚唔靚，豪伯見到只會諗起慈禧太后同埋《宮心計》，講起都毛骨悚然。不過呢個商業社會就係咁㗎啦，驟眼睇個審美標準好似好主觀咁，其實都係萬變不離其宗，就係要閣下消費，依家啲人肥咯，咪話畀你聽要纖體囉，手指光禿禿梗係唔好睇啦，咪要加一層嘢上去囉，唔該各位唔好咁容易上當啦！

網友觀點……

李怒眉

若有靚女用水晶甲幫你挖耳屎，請唔好開心得太早！

八叔

依家女仔啲手指甲整成咁，想佢哋做家務都難。

曹探長

女生十隻指甲，分分鐘殺人唔見血，男人小心！

手襪佬

情侶拖手仔前，記住戴番手襪，咁就唔怕對水晶細菌手啦。

網址：www.lukchiho.blogspot.com