議事堂內亦唔好得幾多，議員壁壘分明，針鋒相對，喺泛民陣營又玩「拉布」之下，撥款申請又要押後至下周五再議。

叮，照咁樣嘈落去，高鐵工程都唔知幾時至可以上馬。大佬呀，唔好再玩啦，知唔知幾多工人等工開呀？知唔知高鐵拖得愈耐成本愈貴呀？內地高速鐵路即將陸續通車，但係香港仲喺度嘈喧巴閉，你話幾丟架呀。

件事搞成咁，班泛民政客固然難辭其咎，但港府更加係罪無可恕。廣深港高鐵前前後後講咗成十年，人哋廣東路段早就開工，今年就可望通車，但係香港路段仲係無影無蹤，眾所周知，愈遲開工造價就愈貴，前年估計三百幾億，依家飆升到接近七百億，當局議而不決，唔通唔使負責？

更弊嘅係，當局嘅諮詢又做到一塌糊塗。其實，好多反高鐵人士都認同香港需要有一條高速鐵路，佢哋只係覺得當局嘅方案有問題，除咗造價太高之外，選址西九、拆毀石崗菜園村，都引起好大爭議。如果一早做好溝通，點會搞到今日咁大鑊？呢班官僚高高在上，慣咗閉門造車，視民意如浮雲，你話抵唔抵炳？

叮佢個鎯鎯，高鐵事件只係冰山一角咋。回歸十二年來，香港陷入泛政治化嘅泥沼，大事又吵，小事又鬧，結果一事無成。特別係跨境基建工程，廣東方面主動積極，港府就唔嗲唔吊，卒之咪搞到一鑊泡囉。

叮，港府○七年雄心勃勃提出十大基建，話可以創造幾十萬個就業職位咁話，但係家陣只有啟德郵輪碼頭同埋港珠澳大橋叫做進入施工階段，其餘八項仲係紙上談兵。靠佢哋嚟解決就業喎，蛇都死啦。

唔怪之得有人將香港同內地城市嘅競爭比喻為龜兔賽跑。當香港以為自己跑得好快，可以瞓番一覺嘅時候，內地省市已經一個個追上嚟嘞。例如上海正全力打造國際金融中心及航運中心，即係話，香港嘅金融及物流兩條支柱已岌岌可危。另外，海南又話要打造國際旅遊島，成為購物天堂，到時實搶走香港唔少旅客，旅遊呢條支柱又隨時折斷，睇港府仲敢唔敢吹水唔抹嘴。

一句講晒，形勢比人強，如果香港繼續爭拗不休，仲唔快快趣趣急起直追，唔使幾年就會玩完，到時莫講話邊緣化，直情走向沉淪都唔奇。叮！