早前有傳富貴黨同工聯會點都唔派人加入委員會，但結果又係另一回事。建制派尋日喺內會互相提名，一開始黃宜弘就提名富貴黨方剛，然後工聯會黃國健提名自己友潘佩璆，林大輝提名陳健波。方剛表現出一副不情不願嘅樣，於是大家上演一幕黃袍加身，旁邊嘅蘇菲勸方剛話：「算啦，接受啦！」梁君彥仲笑方剛：「哎呀，面有難色啊！」方剛支吾以對，最終接受。

事後，方剛聲稱今次係畀人屈，仲講笑咁話：「黃宜弘害人一次，我會記住佢，我會報仇！」方剛如果真係唔想入委員會，睇怕十個大漢都抬唔到佢上轎啦！