東亞運動會早就落幕，相信好多市民都認同香港運動員發揮出極高水準，但市民亦記得政府有好多甩漏。尋日喺立法會民政事務委員會會議上，公文袋議員陳淑莊就批評政府一味歌功頌德，未有檢討比賽場地、傳送火炬尾站風波、即場售票等問題。
民政事務局局長曾德成回應話，香港回歸前冇機會辦呢啲大型運動會，但凡參加過呢類大型運動會嘅人，都知道一定有問題出現，但當局都以高效率一一解決，獲廣大市民認同。
跟住唔知做乜，佢愈講愈㷫，忽然躁狂話：「我明白東亞運成功舉辦對於一啲人係會感到唔高興，但可唔可以唔好將東亞運睇成係由特區政府舉辦，而係由全部香港人去辦呢？咁佢哋見到成功就唔會咁睇唔過眼！」
陳淑莊聽到都莫名其妙，反問德成局長：「請問有邊啲人見到香港成功舉辦東亞運會睇唔過眼？」德成局長即時面懵懵兼口啞啞，無言以對。
所以話呢，呢個年代做高官除咗要有IQ（智商）同EQ（情緒智商）外，仲要避免太過敏感，否則咪似德成局長咁自己攞嚟衰，噴火自焚囉！