尋日喺立法會財委會審議高鐵撥款申請期間，立法會大樓外聚集一群「八十後」示威者，搞「苦行」、義賣同會議直播，搶盡風頭；議會之內，幾位「五十後」議員對呢股「八十後」浪潮另有見解。
代表工業總會嘅梁君彥話從經濟效益角度為「八十後」諗後路，話呢班後生仔有毅力、有拚勁，可惜有啲捉錯用神，將毅力同拚勁放喺唔應該投放嘅地方，如果投放喺事業，肯定所向披靡，做乜都咁掂，對社會好，對自我前途亦好。
同樣係「五十後」嘅工聯會KK黃國健亦有一個「八十後」嘅仔，舊年喺澳洲大學畢業，依家搵緊工。KK話阿仔一樣對社會不滿，成日怨澳洲政府政策唔公平，年輕人發展苦無出路，佢有勸阿仔凡事向積極方面諗。
KK仲話自己都年輕過、激情過，讀初中時已有份參加當年被形容為暴動嘅天星小輪加價示威，爭啲做咗當時絕食抗議嘅蘇守忠第二，但長大後先發現社會有問題，唔係靠激情就可以解決。