高錕喺頒獎典禮上所着嘅燕尾禮服係租番嚟嘅，無法留為紀念，大家於是將目光轉移到高太黃美芸身上，佢喺諾貝爾頒獎典禮上着住嘅一襲寶藍色旗袍，一樣咁搶手。原來典禮後，香港唔少博物館同學校都打高太主意，希望高太捐出呢件喺香港度身訂造、咁有紀念價值嘅戰衣出嚟做展品，供市民觀賞。為此高太仲頭痛緊，諗住到農曆新年返香港嗰陣，先決定捐畀邊個。