09/01/2010

播放本新聞相關短片

政情:阿Paul代師傅出頭

前日喺立法會財委會特別會議上,金融服務界議員「金勞詹」同社民連嘅黃毓民突然爆粗互罵,一個鬧對方「黑底」,另一個鬧對方「監躉」,簡直失禮死人。事後兩人握手言和兼向公眾道歉,又話自覺好肉酸同教壞細路,但係就算沙咗冧都唔見得到市民嘅原諒。佢哋心入面係咪真心後悔,就只有佢哋先知嘞,但可以肯定有啲人仲係餘怒未消。

話說尋日立法會內務委員會喺成立調查白鴿黨議員甘乃威涉嫌求愛不遂炒女助理嘅七人委員會後,就討論係咪要成立調查基督教女青年會前社工受壓事件,即係俗稱嘅「河蟹事件」,同埋係咪應該賦予立法會權力及特權法案,畀委員會有傳召權呢?

「查埋邊個有黑社會身份吖」

一直反對查甘威嘅「旅遊超人」阿Paul謝偉俊又再舊事重提,話甘威事件根本冇原告,本來就唔應該查,依家河蟹事件既冇原告,又冇被告,都唔知為乜要查,更加唔應該查。講講吓,佢仲話若果單憑一句半句就話要查嘅話,咁不如查埋邊個立法會議員有黑社會身份吖!咁都不特止,跟住佢仲好火咁話,咁鍾意查不如個個去做法官,唔好立法。

咦!事有蹊蹺喎!眾所周知,金勞詹同阿Paul係師徒關係,喺立法會事務上同聲同氣,所以佢咁講有啲語帶雙關。點解?其一係前日發生爆粗事件期間,毓民嘅黨友「大舊」陳偉業喺側邊都有插口,鬧埋金勞詹一份,依家阿Paul咁講話查邊個議員有黑社會身份,唔難令人覺得佢係衝住爆粗事件而嚟,仲係乘機為師傅出頭,鬧番社民連轉頭。

其二係立法會依家被賦予立法會權力及特權法案嘅,已經有梁展文事件調查委員會同研究雷曼迷債的專責委員會,加埋甘威事件合共三個,前兩個係泛民主派話要查嘅,甘威就係建制派話一定要查嘅,再加埋十幾個小組委員會,搞到班議員踢晒腳,所以呢次泛民又話要查河蟹事件,阿Paul咪乘機鬧埋泛民同建制派咪亂查,要認清自己嘅職責囉。