呢嗱，政府打算推出殘疾人士院舍買位先導計劃，話可以縮短輪候時間喎。咦，幫到殘疾人士，又能夠為佢哋家人消除後顧之憂，好事吖！但睇落又唔多啱數噃，個計劃為期四年，加埋至多買三百個私營宿位，輪候條龍水蛇春咁長，點止杯水車薪，直頭係滴水車薪啦。

仲有更離譜o架，業界話，如果參與先導計劃，就要按照當局嘅指引增加消防設施同增聘人手，一次過要投入幾十萬。咁嘅話，每個宿位每月費用去到八千蚊，增幅超過一倍。

叮！未見官先打三十大板，樣樣要做到足，到頭來政府至買得嗰兩成宿位，其他宿位費用水漲船高，自費嘅院友無喇喇要畀多成倍錢；因為收費太高，殘疾人士可能望而卻步，私營院舍隨時連本都蝕埋，政府出豉油，院舍出雞，咁仲唔係明搵人笨？

講來講去，問題根本係政府造成。當局唔肯投放足夠資源擴建，依家社署旗下嘅弱智人士宿舍、肢體傷殘人士宿舍長期不敷應用，一位難求。有家長踢爆，患有智障嘅女兒由十五歲等到三十歲，足足等咗十五年，依家仲未獲安排入住。

叮！至弊班高官根本無動於衷，不聞不問。勞工及福利局局長張建宗前排出席電台節目，有殘疾人士家長話個女輪候殘疾人士院舍九年，「連一個限期都冇，感到好絕望」。佢回應話，依家呢類院舍平均輪候時間係九年，「應該差唔多等到」。

要人等足九年，好多家長因為要照顧殘疾子女，冇法子搵食，仲要承受極大精神壓力，難為張建宗仲好意思講「差唔多」。咁嘅政府簡直係冷血，唔怪得殘疾人士家長狂炳「政府根本無理過我哋」啦！

唔少家長迫於無奈，惟有送殘疾子女入住私營院舍，但呢啲院舍人手同服務質素都好參差，未能照顧嚴重殘疾人士嘅需要。早排就發生過患嚴重智障嘅院友喺私營院舍嚴重燙傷，院方出事第二日至將佢送醫院，而且一直冇通知家人。咁嘅服務質素，屋企人點放心吖。

政府資助宿位僧多粥少，私營問題院舍服務質素冇保障，問題積聚多年，社會要求增建資助院舍嘅呼聲不斷。政府迫於輿論壓力，○九年至喺施政報告提出向私營院舍購買宿位應付需求。

如果當局有心幫殘疾人士嘅，就應該快快趣趣增建資助院舍，依家只買得嗰幾百個私營宿位咁大把，根本解決唔到問題。計太一叮話齋，橫掂都唔夠，不如將啲宿位留番畀班「腦殘」高官入去反省下啦。叮！