買完禮物後，佢喺會場四圍望，原來係搵佢後面嗰個好生面口嘅後生仔，原來呢個後生仔就係林鄭嘅大仔。跟住林鄭四圍騰，就係為咗幫囝囝買件由香港桌球神奇小子傅家俊親自設計嘅T恤，果然係廿四孝媽媽！

受囝囝感染變埋粉絲

林鄭話佢哋全家都係桌球迷，事緣囝囝喺英國讀書後就迷上咗桌球，後來仲感染埋細佬同爸爸。佢為咗同個仔有多啲共同嘅話題，亦湊興一齊去睇桌球比賽，睇睇吓自己都變埋粉絲。

當知道傅家俊會出T恤，林鄭就帶埋囝囝去捧場，兼且一口氣買咗三件，送畀兩個囝囝同老公。可惜佢一家嘅偶像傅家俊冇現身會場，搞到攞唔到簽名嘅囝囝有啲失望，做阿媽嘅林鄭就即刻安慰囝囝，話下次見到傅家俊一定幫佢攞簽名，囝囝就即刻笑番晒嘞！