01/01/2010

播放本新聞相關短片

政情:煲呔曾撐體育假面具撕破

本文重點
香港足球隊突破性奪得東亞運金牌,贏得全香港人嘅掌聲,紅到連有份入場觀戰嘅煲呔曾都要黐金糠,述職時向國家領導人吹噓,講到自己好似有份落場踢咁,又周圍同人講會研究增加資源協助體育發展,但尋日喺一個場合度佢就被撕破假面具。

縮骨得把口

香港精英運動員協會尋日搞毅力愛心跑,同場仲有唔同嘅攤位做義賣,為本港一班精英運動員籌募經費。大會可能見煲呔曾口口聲聲話要落實發展體育事業,就請咗佢去做主禮嘉賓,以為佢縮骨極都會花費一千幾百,唔多唔少可以幫補吓吖。

但煲呔曾嘅縮骨程度真係估佢唔到,佢前後只喺會場出現咗二十分鐘,一影完大合照就背向義賣攤位雞咁腳咁走,同人講佢撐運動員都冇人信啦!

到走嘅時候,等咗一輪嘅記者問佢有乜嘢鼓勵說話同班運動員講,佢竟然聲都唔聲就竄上車走人。本來煲呔曾撐運動員只係得把口噏,勢估唔到依家連噏都慳番。