泛民主派山頭自從插多咗社民連呢支旗後，內訌紛爭不絕。早前社民連開記者會揚言要全力搞五區請辭，唔會再夾錢同泛民其他政黨搞聯署活動，所以今日元旦遊行揸旗嘅係民主動力同二十名泛民議員。發起人之一嘅白鴿黨主席何俊仁話社民連事前講好會行喺遊行隊伍最後面，但近日有網民呼籲社民連支持者遊行時「走在最前線」，於是畀人質疑想分文不出就「騎劫」遊行。
民主動力召集人蔡耀昌表明出錢金額同出鏡率成正比，仲話遊行應由發起人行頭，呼籲其他有意參與遊行嘅團體尊重大會。其實，社民連都唔止一次騎劫泛民行動，好似政改諮詢方案公布當日，泛民早就講好齊齊操上政府總部抗議，但社民連三子卻自行聯同網民搶先去禮賓府示威。