同場又見到行起路嚟趷趷吓嘅行會召集人CY梁振英，要兩名醫生扶上台，原來佢早前同家人去北海道滑雪時不慎扭傷左腳，好彩冇乜大礙，尋日仲帶埋太太青儀、大仔傳昕、二女齊昕同細女頌昕一家五口出席派對，認真畀面。CY笑稱咁多醫生在場，一啲都唔擔心腳傷喎。過往好少見到CY一家咁齊人出席活動，據講佢三個仔女已分別喺外國讀緊中學同大學，難得一齊回港敍天倫。

發叔三代同堂慶除夕

轉頭去到「新界王」劉皇發搞嘅家庭聚會，發叔幾個仔女同八個孫仔孫女都到齊晒，三代同堂，加上其他親戚朋友共五十幾人共度除夕，認真開心。發叔同大仔劉業強嘅新年願望係希望身體健康，香港安定繁榮，而發嬸就話希望自己青春常駐喎！