有財委會呢個關卡，政府想快刀斬亂麻都唔得，呢段時間可以做嘅，只有到實。好似運輸及房屋局局長Eva鄭汝樺尋日被問到有冇得放新年假時，佢就話：「呢排咁多嘢，放假會畀人炒o架！」

打民意牌壓泛民議員

一個反高鐵團體之前踢爆建制派議員何鍾泰同石禮謙有利益衝突之嫌，搞到前者喺工務小組冇得投票，而後者咁啱入院做通波仔手術都冇投票。呢個團體尋日接受一個網上電視台訪問時，講到明會繼續刮料，希望可以踢爆類似涉嫌有利益衝突嘅議員，以否決高鐵撥款申請。

雖然政府數夠票，高鐵理應可以過關，但若果真係有更多建制派議員被揭涉利益衝突嘅話，撥款申請分分鐘滑鐵盧，所以Eva喺呢段時間想鬆人都難，仲要瞓身做騷添！

好似假期一完，Eva喺下禮拜一就帶新聞界去武漢。做乜？梗係坐高鐵啦！個團抵達武漢當晚聽取簡介同食飯，Eva都會在場，翌日朝早仲一齊喺武漢坐高鐵落廣州，抵埗後會即場做十五鐘訪問先同大家拜拜，真係做騷咁做。

其實佢為咗高鐵已做咗幾場騷，例如先派副局長邱誠武落村「掃雷」，跟住仲親自落區同村民會面，而早前佢都親身搭過高鐵。高鐵啟動當日都有唔少傳媒爭相採訪，點解佢要再帶團做多次騷呢？好簡單啫，好明顯係單靠佢把口講唔服班議員，咪惟有再繼續硬銷囉。

再講白啲，就係佢想打民意牌，希望高鐵曝光率高啲可以爭取到市民支持，再畀壓力嗰班所謂代表民意嘅泛民主派議員，等佢哋可以鬆手。