01/01/2010

播放本新聞相關短片

博客擂台:新年願望

一個全新的報上部落格,每日與你暢談社會至Hit話題,剖析問題所在。

小白觀點:市民勒緊褲頭唔使纖體

踏入二○一○年,喺度同各位讀者大人講聲新年快樂先呀!為咗去舊迎新,紐約時代廣場每年都有個大解脫日,放定啲碎紙機呀、大錘呀喺度,等群眾將一年內最唔開心嘅回憶當場粉碎。呢個活動,每年都吸引唔少人拎嘢去,有人碎舊相、有人碎電腦,如果香港都有咁嘅活動,小白老弟一定揀拎個磅去。

講起舊年真係往事不堪回首,小弟朝朝上磅都發覺輕咗。鬼咩,呢一年過得咁辛苦,日日被迫勒緊褲頭,唔係講笑,真係足足輕咗十幾磅有多呀!舊年可以成功瘦身,完全歸功於特區政府嘅施政,若然煲呔曾再厚住面皮唔肯落台,睇怕啲纖體公司實聽執笠都得嘞。

網友觀點......

積奇露

新年願望係唔使交稅就好喇!!!

小春提到……

我嘅新年願望係世界和平!

Niki~

希望豬流感疫潮快啲過啦~~~!大家身體健康!

肥波

新一年我想中六合彩,唔使do!

網址:www.sunsiupak.blogspot.com

阿豪觀點:煲呔曾黑色幽默逗你笑

睇番網友們一○年有咩願望,無非都係豐衣足食、中六合彩以後唔使撈咁。呢啲願望爽就梗係爽啦,但係做唔做到就係另一個問題。

豪伯一○年嘅願望好簡單,只係希望能夠開心啲。嗱,想睇笑話,就要多啲留意高官嘅言論喇。好似煲呔曾咁吖,○九年最後一日都把握機會製造笑話,佢寫文章呼籲港人學習香港足球隊逆境自強、喺東亞運奪金嘅精神喎!真係黑色幽默,如果政府對港足有足夠支援,人哋使鬼逆境自強咩!睇嚟今年大家想政府派糖都難。

都好吖,笑多啲,病痛都少啲,自然冇咁大機會成為公立醫院醫療失誤嘅犧牲品,咁咪一次過滿足晒兩個新年願望囉!

網友觀點......

新年勤

願望就係唔使再需要願望。

yoyoyo0218

希望啲股票生生性性,同埋樓價暴瀉,等我可以上到樓,haha~

奧巴牛

加人工、加年尾花紅、加allowance,但千祈唔好加稅……

光頭陳

希望之前唔見咗嘅嘢……頭髮……可以搵得番……

網址:www.lukchiho.blogspot.com