咪住，家陣潮流興可持續發展，人哋對香港發展前景又點睇呀？講起嚟真係羞家咯，香港成長競爭力排名連跌四級，由舊年嘅第七急降到十名以外，排第十一。咪話青島、大連、重慶呢啲近年發展迅速嘅城市吖，連好多港人聽都未聽過嘅內蒙古鄂爾多斯都爬咗香港頭。

正所謂爛船都有三斤釘，香港話晒都係當年「亞洲四小龍」之一，底子有番咁上下，加上回歸以來中央政府力撐，幾乎有求必應，做阿一有乜咁出奇吖。問題係，依家內地城市一個個逼到埋身，差距愈縮愈細；計成長競爭力，仲一個個爬晒頭添，香港原地踏步甚至打倒褪，試問最具綜合競爭力城市呢個位仲坐得幾耐？

研究機構話，本港喺經貿、基礎建設同人才方面嘅綜合競爭力仍居全國首位。查實，香港嘅優勢已經買少見少，正一好似王小二過年咁，一年不如一年咯。

叮！當局咁多年嚟經濟轉型得個齋噏，經濟結構愈來愈單一，獨沽一味推動金融業，煲呔曾仲拍晒心口話金融業可以養一千萬人添。點知一個金融海嘯冚埋嚟，百業蕭條，失業率飆升，更加暴露咗唔少監管方面嘅漏洞，香港經濟實力無以為繼，撐得幾耐，畫公仔唔使畫出腸嘞啩？

講到綜合競爭力，大家心照啦。淨係空氣質素愈來愈差呢一樣，已經嚇到好多有意喺本港發展嘅外國公司望而卻步啦。仲有，貧富差距愈來愈大，貧困人口愈來愈多，適合佢哋做嘅工愈來愈少。

但港府喺紓解民困方面口爽荷包立，經濟跌到落谷底嗰陣就大唱「曙光論」，話最壞嘅情況已經過去；家陣景氣稍微好轉，當局又搏命唱淡，突然悲觀，話嚟緊嘅財政預算案唔會派糖。一句講晒，就係寧做守財奴都唔肯救窮人。政府同市民離心離德，民怨不斷上升，試問競爭力又點提高吖？

研究機構仲指出，上海憑世博效應同長三角「龍頭」優勢，綜合競爭力同成長競爭力都有長足進步，但香港隱憂重重，如果唔改善，畀上海爬頭係遲早嘅事。

話時話，呢次國家領導人再向煲呔曾提及深層次矛盾，即係暗示香港有唔少隱憂啦。回歸十二年，空轉十二年，競爭力老本早就食得七七八八啦，家陣政治紛爭不斷，經濟停滯不前，社會矛盾擴大，民怨一觸即發，煲呔曾好自為之啦。叮！