城大校長郭位喺舊年五月正式嚟香港履新，到依家只係年幾，就已經示範乜嘢叫「一年白頭」。郭校長話以前冇乜白頭髮，就算郭爸爸都係到咗七十歲先有白頭髮，但依家佢六十歲都未夠，來港後啲白頭髮就係咁生出嚟，雖然唔似「任總」任志剛咁做咗白頭佬，但都令佢睇上嚟加添咗幾分滄桑。
三千煩惱絲因何由黑變白？郭校長話要管理成間學校真係唔容易，由學校行政、未來發展、籌款等都要一腳踢，好似啱啱過咗嘅聖誕節咁，本應好好慶祝順便利用假期休息吓，但佢都要同校董開馬拉松式會議，真係想抖吓都難。咁講，可見大學工作幾咁辛苦，但見佢咁忙，睇怕都冇時間去做頭髮護理㗎喇，若果想睇落精神啲，郭校長不妨諗吓用噴髮劑，咁就可以快啲黑番嘞。
總結過去一年城大發展理想時，佢話新一年要再上一層樓，大學喺一月中就會公布未來五年嘅發展大綱，仲會羅列城大依家嘅缺點，再對症下藥咁話。咁即係話佢又有排忙啦！不過，佢漏口風話城大密鑼緊鼓籌辦獸醫課程，有城中富豪已拍心口寫支票支持，相信好快會成事。咁都算有啲安慰！