對於煲呔曾死撐領導人明令佢解決嘅深層次矛盾，純粹係指經濟轉型，波波認為肯定唔止咁簡單，最少仲包括貧富懸殊等社會民生問題，最大鑊係煲呔曾政府根本唔肯承認呢個係一個問題。

波波話綜合最新嘅經濟數據，會計界幾乎一致認為本年度政府即使未能轉虧為盈，赤字亦會大幅少於預期，但財爺鬍鬚曾日前仲死撐財赤嚴重，如果唔係會計數學攞零分，就係刻意為來年預算案拒絕派糖紓困鋪路。以現有嘅五千億儲備水平，波波認為政府絕對有能力再加碼紓困，但每次佢同鬍鬚曾討論有關問題時，對方都反問佢有乜方法幫政府收多啲稅，令佢非常冇癮。

佢認為鬍鬚曾最錯嘅係喺早兩年形勢大好時，將「由天跌落嚟」嘅上千億盈餘一次過派晒，同埋為咗兌現煲呔曾嘅親商競選承諾，調低利得稅同薪俸標準稅率，向一小撮大商家同打工皇帝送大禮。如果鬍鬚曾當年肯審慎啲，依家政府就有大把彈藥應付多幾波金融海嘯，唔使扮窮慳住唔敢使。