大輝率先消費百二蚊，喺泰昌餅家買咗十包龍鬚糖，之後一行人就去救世軍嘅攤檔。陳健波買咗五個相架，每個盛惠五十八蚊；陳茂波就揀中二百幾蚊嘅手鏈一條；譚偉豪就唔貴唔愛，睇中獨一無二嘅手織頸巾，仲快快手擺上頸，然後推介畀四散人。之後佢哋再去農圃，由大輝請客食碗仔翅同燕窩蛋撻，譚偉豪就繼續豪爽，買咗隻五百五十蚊嘅南非鮑魚請大家食。

繼五散人後，財經事務及庫務局副局長Julia梁鳳儀都喺工展會消費咗一千一百幾蚊，主要買咗個本地品牌嘅智能煲，貪佢可以煲粥煲湯兼燉嘢，但佢笑言自己飲就叻，煲嘢嘅工夫留番畀工人喎！此外佢仲買咗廚房用嘅膠盒，同埋有老虎公仔嘅冷氣被，叫做交咗功課。