早前有民調結果顯示，甘威憑藉有好感事件而知名度大增，首次躋身十大議員之列，都算係因禍得福，但佢就拖累埋成個立法會，令市民對全體議員不滿度激增百分之十三，高達百分之四十七，創出五年新高，簡直係佗衰家。

白鴿黨有呢個佗衰家，主席「鐵頭仁」何俊仁尋日出席電台搞嘅「人人不醉駕」活動時，大會叫佢寫啲宣揚反醉駕嘅標語，佢竟然話：「千萬不要一時糊塗，終身抱憾。」咦！唔通鐵頭仁都踩甘威一腳？就連主持都即時笑指呢句話好啱用嚟形容甘威嘅境況，搞到鐵頭仁哭笑不得。

七人調查小組未夠腳

鐵頭仁事後承認甘威事件引起好多爭論，令市民對立法會產生負面印象。咁即係認衰啦！但佢仲死撐議會係一個處理矛盾嘅地方，呼籲市民用包容嘅心態看待立法會喎。平時政府官員有少少失誤，白鴿黨定必問責到底，依家自己人犯錯就叫大家包容，擺明係嚴人寬己啫。

同場嘅建仔議員被問到市民對議員不滿度飆升時，都忍唔住怪罪泛民議員：「我哋呢輪做啲嘢都冇乜建設性，好似高鐵咁，要過又過唔到，有啲同事嘅行為又唔係幾好……大家都明㗎啦，得個鬧字，同事都要檢討吓。」跟住問到甘威係咪不滿度激增嘅主因時，佢斬釘截鐵咁話：「好明顯啦，都唔使多解釋。」

立法會內務委員會將喺下年一月八號成立七人小組調查甘威事件，但到尋日只係得三個議員報名。建制派原來預咗富貴黨同工聯會各派一人加入，但聽聞佢哋會死守到最後一刻先做決定，立法會秘書處尋日再發通告提醒議員報名。根據議事規則，如果最終湊唔夠數，內會當日會即時提名議員加入。睇嚟大家想隔岸觀火多於將甘威呢件麻煩事攬上身。