小白觀點：加以訓練可幫手捧餐

快餐店出現巨鼠家族，記者影到其中有隻成呎半咁長，身手不知幾矯健。有圖為證，鼠王好似吊咗威也咁一個飛身，由梳化跳去水吧搵食，簡直係超力鼠呀！最過癮嘅係，佢哋有時都好卡哇伊o架，識得鞠躬請請添，如果加以訓練，唔止可以hand hand，話唔埋識捧餐畀客添呀！

香港啲老鼠咁鬼生猛，又咁有生命力，嗱，下次煲呔曾北上同阿爺交功課時，唔好再車天車地搵港足抽水喇，不如話見到老鼠逆境自強嘅振奮場面，覺得「歷歷在目、非常感動」，同港人克服困難嘅精神一脈相承，阿爺見佢連快餐店衞生都未搞得掂，相信唔會奢望佢有能力解決「深層次矛盾」啩。

網友觀點...X）...

[　may　]

大隻鼠蹦蹦跳幾過癮呀，有咁大間樂園畀佢哋玩喎，仲唔作反咩！

[　GaGa　]

使乜靠人起米老鼠樂園吖，港式老鼠樂園通街都係，拆咗佢好過啦！

[　Jason Law　]

政府都算係咁啦，靜雞雞縱容快餐店養咁多鬼馬鼠，硬撼米老鼠，話唔定他朝有日港式鼠店揚威海外添。

[　貓咪　]

人鼠互睥幾盞鬼呀！一家幾口一齊出嚟搵食，好溫馨！

網址：www.sunsiupak.blogspot.com

阿豪觀點：鼠界平等羨煞香港人

食肆竟然可以成為大老鼠開P嘅場地，諗起都嘔番晒啲隔夜飯出嚟。咦，係喎，會唔會係嗰間快餐店最近推出野味套餐呀……廣州鼠王李鏡就睇嚟又到出場嘅時候嘞。

不過睇落其實都幾羨慕呢一個巨鼠家族，起碼夠晒自由自在，鍾意去邊度覓食就去邊度覓食，食環署捉得又唔落力，可見人類對佢哋都算係咁。老鼠嘅世界真係好平等㗎，雖然搵食嘅競爭都可能係好激烈，但係只要肯自力更生，都唔會有其他老鼠出嚟阻頭阻勢吖！人類就唔同囉，當你撈唔掂攞綜援，固然要忍受政府「綜援養懶人」嘅冷嘲熱諷；好嘞，你想靠自己雙手搵食，好似話做小販咁吖，都要畀食環署販管隊趕盡殺絕。人不如鼠呀老友！

網友觀點...X）...

[　無名火　]

咁咪唔使專程去咁遠睇個老鼠樂園囉……哈哈！

[　釘子戶　]

唓，眼不見為乾淨，話唔定其他餐廳都係咁，只不過大家見唔到，食得心安理得咁解啫……

[　龍馬精神　]

香港真係愈嚟愈污糟，都搞咗清潔香港運動咁多年啦……

[　萬子哥　]

叫班高官出嚟做番場滅鼠騷大龍鳳咪得囉，起碼可以乾淨兩日咁大把吖嘛！

網址：www.lukchiho.blogspot.com