案情話，舊年四月同埋九月，六十五歲嘅事主大便失禁，用手亂咁挖，搞到成手成身同埋張床都污糟晒。被告見到後，就用粗口大鬧事主，然後又將婆婆沾滿糞便嘅手塞入佢嘅嘴。另外，被告仲曾經兩次掌摑呢位老人家。

咁都得？呢條友係咪人嚟㗎？老人家已經病成咁，仲點可以對佢做出咁冇人性嘅事。唔怪之得法官曾直斥被告侮辱長者尊嚴，稍有良知嘅人都唔會做出咁令人惡心嘅行為。法官早前仲直斥被告「必遭天譴」。

正所謂惡有惡報，無良護理主任終於受到應得懲罰。不過，咪以為咁就一天都光晒，呢單案件只係冰山一角咋。實際上，好多私營安老院直情變咗虐老院。早排本報就踢爆過，有啲院舍實行非人性管理，即係唔當長者係人。公公婆婆本來可以落床行路，但院方硬係將佢哋綁喺床上，大小便仲未失禁，但偏偏要佢哋用尿片，搞到佢哋冇晒尊嚴。

有啲私營院舍仲離譜，攞報紙當尿片畀長者用，又會將長者集合埋一齊，一次過幫佢哋沖涼，有時仲將燙熱嘅食物餵畀長者食。講到環境衞生就更加唔使恨，有學者突擊訪問一啲私人院舍，發現床單污糟邋遢，上面仲有曱甴爬嚟爬去，學者直斥「唔係人住嘅地方」。

如果長者受咗傷仲慘，鳳溪護理安老院上周有位九十歲婆婆，早上喺沐浴椅滑倒撞傷頭部，但係直到中午家人探訪，先至發現佢不省人事，急急送醫院救治，可惜已經救唔番。

喂，亂成咁，社署唔理o架？嘥氣啦，佢哋平時闊佬懶理，出咗事先至做事後諸葛亮。嗱，尋日法院判決之後，社署就懶正義咁話，絕對唔容忍安老院舍發生虐老事件，仲話社署已經加強咗巡查，發現問題要嚴肅處理咁話。

但係香港防止虐待長者協會踢爆，現時缺乏虐老條例保障，加上社署監管又懶懶閒，令私營安老院舍有恃無恐虐待長者。講到尾，都係社署敷衍塞責，先至會搞到咁大鑊。

叮佢個鎯鎯，香港嘅長者都幾可悲，好多人申請入住津貼安老院，等到死都等唔到，有啲人只好入住私營安老院，點知畀人咁糟質，生不如死。

之不過，人心都係肉做嘅，邊個冇父母呀？請問社署署長聶德權，如果畀人虐待嗰個係你嘅親人，你仲可唔可以企埋一邊講風涼話呀？快快趣趣做番啲嘢啦，唔係必遭天譴！